Gwändliwächsler Pfäffikon

 
Wärum de Name "Gwändliwächsler" werded sich viel frage. Ganz eifach, will mir nach Möglichkeit alli Jahr s'Gwändli bzw. s'Motto wächslet.  

Es sind emal es paar Fasnachtsverruckti Dame in Pfäffike gsi. Die händ sich imene Verein, a de Chilbi oder susch alässlich vonere Hundsverlochete kenneglernt. Mer hät sich bald entschlosse, gmeinsam amene Maskeball oder ähnlichem teilznäh. Da alli de Plausch gha händ, sind Treffe und Veraschtaltigsbsüech immer hüfiger worde. Im Lauf vo de Ziit händ sich au einigi Ehemanne, ja sogar au einigi Nachkomme, zu de Rundio gsellt. I de verflossen Jahr sind manchi Fründschafte gschlosse und einigi Fäscht gfiired worde. oft hät üseri Fasnachtsgruppe au en Jubilar/in am runde Geburtstag überrascht. Sogar a Hochziite sind scho einigi vo eus aztreffe gsi. Das hät doch allne guet ta, bsunders i de hütige stressige Ziit. So isch scho oft de Gedanke ufcho, dasmer eigentli en Verein gründe chönt. Nöd zletscht us finanzielle Überlegige. So isch zum Bischpiel en Durchfüerig vomene Lottomatsch ohni Statute gar nöd möglich. Es chan au kein Gmeindsbiitrag erhältlich gmacht werde. Uf chlini Inahmequelle simer doch agwise, da jede Mitmachendi sini Chleider, Maske etc. sälber berappe mues. Es werdet au sämtlichi Kostüm eigehändig agfertiged.   Am Mittwuch, de 29. Oktober 1997, händ sich alli erwachsene Fasnächtler bi de Ruth Steiner troffe. Mer hät a dem Abig d'Fasnachtsgruppe "Gwändliwächsler" gründet. Als erschti Präsidäntin isch Eischtimmig und mit Applaus d'Mary Kälin gwählt worde.  

Übrigens...wärum de Name "Gwändliwächsler" werded sich viel frage. Ganz eifach, will mir nach Möglichkeit alli Jahr s'Gwändli bzw. s'Motto wächslet.

Webseite: http://www.gwaendliwaechsler.ch